भाद्र पहिलो साता गिरीको `फोर्स`

स्वामी रविन्द्र भारतीको निर्देशन तथा शिव गिरीको निर्माण रहेको फिल्म फोर्स फिल्महरुको भीडमा आगामी भाद्र ८ गतेदेखि अल नेपाल रिलिज हुदैछ । एक्सन प्रधान फिल्म फोर्समा शिव गिरी, क्षितिजा शाक्य, ऋचा सिंह ठकुरी, मोहित भारद्वाज, धर्मेन्द्र आचार्य, उमेश खड्का, सन्तोष तामाङ, उत्तम विष्ट आदि कलाकारको अभिनय रहेको छ । जसमा मोहित र राखी भारतीय कलाकार हुन् ।

फिल्मका नायक तथा निर्माता शिब गिरी द्वारा निर्मित यो तेस्रो फिल्म हो । यसअघि उनले फैसला र फर्ज निर्माण गरिसकेका छन् । यी दुई फिल्मबाट पाएको प्रतिक्रियाले उनले तेस्रो फिल्मको रुपमा फोर्स निर्माण गरेका हुन् । रिलिज डेट नजिकिदै गर्दा फोर्स टिम प्रचार प्रसारमा निकै व्यस्त पनि छ । पुलिस, पोलिटिक्स, विजनेश र डन गरी ४ ओटाको वास्तविक दरिलो फोर्सलाई फोर्सको पर्दा मार्फत देखाउनेछ ।


फोर्समा निर्माता तथा नायक गिरीको शारीरिक आकार आकर्षक देखिएको छ । के यो तस्वीर नायक तथा निर्माता गिरीको नै होया जोडिएको हो ? प्रश्न चिन्ह खडा हुन्छ र त्यो स्वाभाविक पनि हो । निर्माता गिरी भन्छन्,'यो मेरो शरिर नै हो । आफ्नो टाउको अर्काको शरिरमा हालेर व्यापार गर्ने मान्छे हैन म ।' यसो त उनको शरीर कस्तो छ भन्ने कुरा थाहा पाउनको लागि तपाईले एकपटक हलसम्म पुगेर फोर्स हेर्नै पर्ने हुन्छ ।

पोस्टरमा शरिर देखाएर दर्शकलाई अकर्षित गर्न खोजेका गिरीको यो फिल्मलाई भने दर्शकले कत्तिको मन पराउने हुन् हेर्न बाँकी छ । उनी छिट्टै नै ‘फसाद’ र ‘फरार’ फिल्म लिएर पनि आउदैछन् । सर्सर्ती हेर्दा शिव गिरीले फैसलादेखि नै ‘फ’ बाट सुरु हुने नामलाई नै पछ्याएका छन् । कारण के हुन सक्छ त ? गिरी भन्छन्, 'मलाई फ अक्षर फाप्छ त्यसैले ।' हेरौं 'फ' अक्षरले उनलाई कुन मोडमा पुर्यागउँछ ।