असोज १२ गते देशभर एकसाथ रिलिजको तयारी गरेको फिल्म भिसा गर्ल युनिटले बुधबार पत्रकार भेटघाटको आयोजना गरि फिल्मको दुई गीत र एउटा प्रोमो सार्वजनिक गर्यो ।
सार्वजनिक दुई गीत मध्ये एकै छिन बोलको गीतमा सन्तोष लामाको स्वर, कालिप्रसाद बाँस्कोटाको संगीत रहेको छ । उक्त गीतलाई कालिप्रसाद र सबिन एकतारेले मिलेर लेखेका हुन् । यस्तै सार्वजनिक जहाँ टेकु बोलको गीतमा बिनय श्रेष्ठ, कर्मा, रेमनदाश श्रेष्ठ र श्रेया सोताङको स्वर रहेको छ भने शब्द संगीत कालिप्रसाद बाँस्कोटाको रहेको छ । युनिटले यसअघि प्रोमोश्नल गीत सार्वजनिक गरिसकेको थियो ।
सिजी इन्टरटेन्मेन्ट प्रालीको निर्माणमा प्रचण्डमान श्रेष्ठले निर्देशन गरेको सो फिल्ममा ऋचा शर्मा, बिनय श्रेष्ठ, कर्मा, रेमनदास श्रेष्ठ, रिमा विश्वकर्मा, सलोनी राजभण्डारी र मेनुका प्रधानको मुख्य अभिनय रहेको छ । कलाकार ऋचा र विनयको सह-निर्माण रहेको लाईट कमेडी फिल्म भिसा गर्ल विदेश जाने धुनमा रहेका युवापुस्तालाई केन्द्रित गरेर निर्माण गरिएको हो । निर्देशक श्रेष्ठको लेखन रहेको सो फिल्म हालको काठमाडौं परिवेशमा बस्ने युवाहरुको सपना र आकांक्षाको वरिपरी घुमेको बताईएको छ ।
पत्रकार भेटघाट कार्यक्रममा फिल्मका कलाकारहरूले सुटिङका बेला आफूले भोगेका अनुभवहरू साटेका थिए भने निर्माण कम्पनी सिजी ईन्टरटेन्मेन्टका प्रबन्ध निर्देशक राजेन्द्र शलभले फिल्मको सुटिङमा कम्पनीले हस्तक्षेप नगरेको र फिल्म हेर्न आतुर रहेको बताए ।
